ജീവിതം ഒരു പ്രാര്‍ഥന എന്ന പാഠത്തിലെ കൂടുതല്‍ ചോദ്യങ്ങളും ഉത്തരങ്ങളും (Class 9)

1. കെ.എം. മാത്യു ഓര്‍മ്മിക്കുന്ന അന്നമ്മയുടെ സ്വഭാവസവിശേഷതകള്‍ എന്തെല്ലാമാണ്?
വീട്ടിലെ സഹായികളെ തന്നോടൊപ്പം സ്‌നേഹത്തോടെ ചേര്‍ത്തുനിര്‍ത്തുന്ന രീതിയായിരുന്നു അന്നമ്മയുടേത്. എല്ലാവരുടെയും വ്യക്തിപരമായ ആവശ്യങ്ങള്‍ അവര്‍ ശ്രദ്ധിച്ചിരുന്നു. അവരോടൊപ്പമിരുന്നാണ് അന്നമ്മ പ്രാര്‍ഥിച്ചിരുന്നത്. ഓരോരുത്തരുടെയും ആവശ്യങ്ങള്‍ക്കുവേണ്ടി ഉച്ചത്തിലായിരുന്നു അവര്‍ പ്രാര്‍ഥിച്ചിരുന്നത്. സ്‌നേഹപൂര്‍ണമായ ഇടപെടലുകളിലൂടെ അന്നമ്മ ഒരു സ്വകാര്യലോകം സൃഷ്ടിച്ചിരുന്നു. ഈ സവിശേഷതയാണ് അവരുടെ വേര്‍പാടിനുശേഷം കെ.എം. മാത്യു സ്‌നേഹാദരങ്ങളോടെ ഓര്‍ക്കുന്നത്.
2. അന്നമ്മയുടെ മരണശേഷം മാത്യു ജീവിതത്തില്‍ വരുത്തിയ മാറ്റമെന്താണ്?
ഭാര്യ അന്നമ്മയുടെ മരണം കെ.എം. മാത്യുവിന്റെ ജീവിതത്തില്‍ ശൂന്യതയുണ്ടാക്കി. വീട്ടിലെ സഹായികളുമായി അന്നമ്മയ്ക്കുണ്ടായിരുന്നതുപോലുള്ള ബന്ധം കെ.എം. മാത്യുവിനുണ്ടായിരുന്നില്ല. തന്റെ ഏകാന്തതയില്‍നിന്ന് രക്ഷനേടാനാണ് അദ്ദേഹം  വീട്ടുജോലിക്കാരുമായി അടുത്തിടപഴകിയത്. അന്നമ്മയുടെ പ്രാര്‍ഥനാരീതിയും അദ്ദേഹം അനുകരിച്ചു. ജോലിക്കാരുമായി തമാശപറയാനും പരസ്പരം കളിയാക്കാനും സമയം കണ്ടെത്തി. മുന്‍വിധികളില്ലാത്ത ഇടപെടലുകളിലൂടെ ആഴമേറിയ സൗഹൃദമാണ് കെ. എം. മാത്യു സൃഷ്ടിച്ചെടുത്തത്. അന്നമ്മയെ അക്ഷരാര്‍ഥത്തില്‍ അനുകരിക്കുകയാണ് മാത്യു ചെയ്തത്.