ആത്മാവിന്റെ വെളിപാടുകള്‍ എന്ന പാഠത്തിലെ കൂടുതല്‍ ചോദ്യങ്ങളും ഉത്തരങ്ങളും (Class 10)

1. സാധാരണ സാഹിത്യകാരന്മാരില്‍നിന്ന്  ദസ്തയേവ്‌സ്‌കിയെ വ്യത്യസ്തനാക്കുന്ന എന്തെല്ലാം സവിശേഷതകളാണ് അന്നയുടെ വാക്കുകളിലൂടെ വ്യക്തമാവുന്നത്?
ജീവിതത്തിലെ ദുരിതങ്ങള്‍ മനുഷ്യരെ നിരാശരാക്കും. എന്നാല്‍ ജീവിതത്തെ കൂടുതല്‍ കൂടുതല്‍ സ്‌നേഹിക്കാനുള്ള വഴികളായാണ് ദസ്തയേവ്‌സ്‌കി ദുരിതങ്ങളെയും വേദനകളെയും കണ്ടത്. വിധി അദ്ദേഹത്തിന് നല്‍കിയതു മാത്രമല്ല, അദ്ദേഹം  സ്വയം ഏറ്റെടുത്ത  പ്രാരാബ്ധങ്ങളും ഉത്തരവാദിത്വങ്ങളും ദുരിതങ്ങളുടെ ഭാരം  ഇരട്ടിപ്പിച്ചു. ചുഴലിരോഗവും ദാരിദ്ര്യവും ചൂതുകളിഭ്രാന്തും  അദ്ദേഹത്തിന്റെ ആരോഗ്യം തകര്‍ത്തു. ബന്ധങ്ങളുടെ ബാധ്യതകളും വഞ്ചനയും ചതിയുമെല്ലാം ആ മനസ്സിന്റെ ആരോഗ്യത്തെയും ബാധിച്ചു. എന്നിട്ടും അദ്ദേഹം അവയെയെല്ലാം സ്‌നേഹിച്ചു എന്നതാണ് അദ്ഭുതകരം. സാധാരണ എഴുത്തുകാര്‍ എഴുതാന്‍ വിഷയങ്ങളില്ലാതെയാണ് വിഷമിക്കാറുള്ളത്. എന്നാല്‍ ദസ്തയേവ്‌സ്‌കി എഴുതാനുള്ള വിഷയങ്ങളുടെ ആധിക്യംകൊണ്ടാണ് വീര്‍പ്പുമുട്ടിയത്. നന്മകളിലുള്ള ഉറച്ചവിശ്വാസമാണ് ദസ്തയേവ്‌സ്‌കിയുടെ ഏറ്റവും വലിയ സവിശേഷതയെന്ന് അന്നയുടെ വാക്കുകള്‍ വ്യക്തമാക്കുന്നു.